පාලවිය කල්පිටිය ප්‍රධාන මාර්ගයේ යුක්තිය මෙහෙයුම යටතේ වාහන සෝදිසි කිරීමේ නිරතව සිටි කල්පිටිය පොලිසියේ නිලධාරීන් විසින් පසුගියදා (21) පස්වරුවේ ත්‍රිරෝද රථයකින් එළුවකු ප්‍රවාහනය කරමින් සිටි එළු ජාවාරමේ නිරත තරුණයන් තිදෙනෙකු අත්අඩංගුවට ගෙන ඇත.
නාච්චිකල්ලිය ප්‍රදේශයේ දී මෙම අත්අඩංගුවට ගැනීම සිදු කළ අතර, කිසිදු නීත්‍යනුකූල ලේඛනයකින් තොරව එළුවා ප්‍රවාහනයේ යෙදෙමින් සිටි බැව් අනාවරණය විය. සැකකරුවන් තිදෙනා නොරොච්චෝල ප්‍රදේශයේ පදිංචි වයස අවුරුදු 22 හා 30 අතර අයවලුන් වෙති.
මොවුන් තිදෙනා කල්පිටිය හා ඒ අවට ප්‍රදේශවල නිදැල්ලේ හැසිරෙන එළුවන් හා එළු ගාල් ආශ්‍රිත එළුවන් අල්ලාගෙන ත්‍රිරෝද රථයකින් ප්‍රවාහනය කොට මස් පිණිස විකිණීම කලක සිට සිදු කරන බැව්, පොලිස් පරීක්ෂණවලින් අනාවරණය වී ඇත.
සැකකරුවන් සහ නඩු භාණ්ඩ පුත්තලම මහේස්ත්‍රාත් අධිකරණයට ඉදිරිපත් කිරීමට නියමිතය. කල්පිටිය වැඩ බලන පොලිස් ස්ථානාධිපති පොලිස් පරීක්ෂක වසන්ත සිරිලාල් එදිරිසිංහ මහතාගේ උපදෙස් පරිදි පරීක්ෂණ ක්‍රියාත්මකයි.
